| O festival internacional de cine infantil celébrase nas Casas da Cultura do Milladorio e Bertamiráns entre o 14 e o 17 de novembro e está adicado aos pioneiros do cinema.
| Cinema Miúdo desvela o cartel da súa sétima edición, deseñado un ano máis por Srta. Doti e no que aparecen os Lumière, Méliès, Chaplin ou Mickey Mouse.
03.10.2024 | Cinema Miúdo quenta os proxectores para a celebración da súa sétima edición, que terá lugar entre o 14 e o 17 de novembro nas Casas da Cultura de Bertamiráns e do Milladorio, en Ames, o concello con maior ratio de nenos e nenas de Galicia. O certame está xestionado por terceiro ano pola entidade cultural galega Abella Producións, que desvela hoxe o cartel e temática deste ano: os pioneiros do cinema.
A imaxe gráfica do certame é obra da deseñadora e ilustradora Alejandra Abalde, coñecida no eido creativo como Srta. Doti. Fiel ao seu estilo colorista e entrañable, Abalde retrata un patio de butacas no que podemos recoñecer persoeiros significativos e momentos abraiantes da historia do cinema. Os irmáns Lumière, a lúa do filme de Georges Méliès, Charles Chaplin e Alice Guy, comparten sala con personaxes do cine infantil e de fantasía como Mickey Mouse. “Quixen crear pequenas escenas dentro do cartel, convidando aos nenos a imaxinar as historias que viven os personaxes representados; e incluín diversos obxectos ocultos para que poidan xogar a descubrilos, o que engade un toque interactivo e lúdico ao deseño”, explica Srta. Doti.
A temática será transversal a moitas das actividades do festival. A través de proxeccións, unha exposición e obradoiros interactivos, a cativada terá a oportunidade de explorar a maxia do cinema desde os seus inicios, comprendendo como estes visionarios transformaron as imaxes en historias cativadoras e sentaron as bases para a arte cinematográfica que desfrutamos hoxe en día. Ao mergullarse no legado destes pioneiros, as nenas e nenos de Ames aprenderán sobre técnicas cinematográficas e desenvolverán un sentido de apreciación pola arte e a narrativa visual.
A temática da vindeira sétima edición celebra a historia do cinema ao tempo que inspira ás novas xeracións a soñar e crear, fomentando a súa imaxinación e curiosidade. Cinema Miúdo brinda ás nenas e nenos a oportunidade de conectar co pasado e motívaos a contar as súas propias historias, converténdose nos cineastas do mañá.
Cinema Miúdo
Cinema Miúdo é un festival de cine infantil nado no concello de Ames en 2018 que cada ano crece en número de espectadores e repercusión. O festival, que ten carácter internacional, quere proporcionar ao público miúdo galego a oportunidade de desfrutar de filmes inéditos, orixinais, sorprendentes e de descubrir olladas doutras partes do mundo. Deste xeito propíciase que a rapazada descubra o gusto polo cinema e fórmase un público futuro con sensibilidade artística, interese cultural e espírito crítico ante o consumo audiovisual. Isto ten especial relevancia para o Concello de Ames, que ten a maior ratio de nenos e nenas de toda Galicia.
Nas anteriores edicións de Cinema Miúdo, o público gozou de sesións con filmes de Galicia, Francia, Corea, India, Afganistán, Marrocos ou Estados Unidos ademáis de sesións específicas para escolares, mesas redondas para a comunidade educativa, obradoiros, e sesións musicais.
